Харин жижиг, дунд аж ахуй нэгжүүдийг болохоор татварын тайлангаа хоёр гуравхан хоног хоцорсөн төдийд өлөн тас шиг л шүүрч аваад торгодог шигээ улсаа луйвардсан улс төрчдийг хэдий болтол хугацаа хожуулж эрхлүүлэх вэ. Улс төрд нөлөөтэй, том албан тушаал хашиж байсан, намдаа фракцтай нь төрийн эрх мэдлийг худалдах, ард түмний язгуур эрх ашиг, улс эх орныхоо эдийн засагт хохирол учруулах хэмжээний хулгай луйвар хийхэд хэдхэн хоног хорьсон болоод хэргийг нь хэрэгсэхгүй болгодог, шүүх засаглал, хууль хүчний байгууллагыг юман чинээнд тоохгүй байх, гадаадад дүрвэн тэндээ оффшор дансанд хөрөнгө хурааж төсвөөс хулгайлсан мөнгөөрөө төр түмнээсээ баян амьдрах… гэх мэтийн гажуудлын үндэс нь ердөө л эрх мэдэл, хөрөнгө мөнгөний томоохон наймааны золионд төр улсаа тавиад туучихдаг хандлага буюу хэтэрхий цэвдэг сэтгэлээр төрийн сэнтийг олон жил эзлэн суусан нам, бүлэглэл юм.
Эрх баригчдын ганц чаддаг нь ард түмнээ буруутгах, алдаа дутагдал өчүүхэн гаргахад шийтгэх, хорихдоо гаргууд боллоо. Аль ч системд дархлаа, эмх цэгцгүйдэн, амьдрах чадвар нь алдагдахаар замбараагүй шийдлүүд ар араасаа цуварч тогтолцоо нь нуран унах сүйрлийн зам тосно. Үүнтэй адил дэлхийн шинэ хандлага, цаг үе, хэт хөгжингүй эрин зуунтай хөл нийлүүлж алхах чадамжаа бүрэн гээсэн улс төрийн хүчин төрд ноёрхох тусам нийгмийн шинжтэй доройтол улам бүр хүчээ авах төдийгүй хожим харамсавч барахгүй болох аж.
