Салдангийн Одонтуяаг сайд болмогц зарим нөхдүүд авлигадаж байгаад дарга болно гээд гүйж явна гэнэ… арай ч үгүй байлгүй дээ
Богдхан уулын дархан цаазат газрын Хамгаалалтын захиргаа гэж яасан үйл тамаа эдэлсэн газар вэ? Сайд дарга солигдмогц хамаг л болохгүй нөхдүүдийг энэ газар руу чихдэг болж… 2022 оны 10 дугаар сарын дундуур “Б.Бат-Эрдэнийн томилсон “БАЦААНУУД” Богдхан уулын дархан цаазат газрын захиргааг самарч дуусгалаа” гарчигтай нийтлэл бичиж байв. Тухайн нийтлэлд Мижиддоржийн Дорж гэх 1990 оны пацани энэ газрыг самарч дуусч байгаа тухай баримттай мэдээллийг дурдсан бөгөөд тухайн үеийн сайд (одоо УИХ-ын гишүүн болсон) Бат-Өлзийн Бат-Эрдэнэ яаралтай арга хэмжээ авч М.Доржийг албан тушаалаас нь чөлөөлж байв. Гэхдээ М.Дорж сүрхий баяжиж аваад явсан тухай нь одоо ч жиг жуг хийсээр… Тэгвэл М.Доржтой хамт Энхтөрийн Цогбадрал гэх нөхөр Богдын захиргаанд томилогдон ирж байсан бөгөөд одоо ч тодорхойгүй тушаалтай, хуульд нийцээгүй алба хашсаар байгаа аж… энэ нөхөр л С.Одонтуяаг сайд болсонд маш ихээр баярлаж, Богдхан уулын дархан цаазат газрын Хамгаалалтын захиргааны дарга болохоор улайран хөөцөлдөж эхэлжээ. ЭНЭ ТУХАЙ ДОР ӨГҮҮЛСҮ… Шоу цэнгээнээс өөр юм мэддэггүй М.Дорж гэгчийг яаралтай буулгасны дараа Богдхан уулын дархан цаазат газрын Хамгаалалтын захиргааны даргаар Нямдоржийн Ганзориг гэгчийг томилжээ. Гэвч энэ томилгоо бас л асуудалтай. Н.Ганзориг нь Хил хамгаалах байгууллагад ажиллаж байсан. Өөрөөр хэлбэл төрийн тусгай албанд ажиллаж байсан хүн юм. Төрийн захиргааны албанд гурваас дээш жил B -ээс дээш үнэлгээтэй хүнийг томилно гэсэн шалгууртай Богд захиргааны газарт төрийн тусгайд ажиллаж байсан хүнийг даргаар томилчихжээ. Түүний энэхүү томилгоонд Б.Бат-Эрдэнийн үед Байгаль орчин, Аялал жуулчлалын яамны Төрийн нарийн бичгийн даргын үүрэг гүйцэтгэгчээр томилогдож байсан С.Цогтгэрэлийг нөлөөлсөн гэж ярьдаг. Уг нь Н.Ганзориг Говийн их дархан цаазат газрын захиргааны Б хэсэгт ажиллахаар шалгалт өгч тэнцсэн гэдэг ч Богдын захиргааны дарга болчихсон яваа нь С.Цогтгэрэлийн нөлөө. Энэ бол Төрийн албаны салбар зөвлөлөөс гарсан 2 ноцтой алдаа юм. За ингээд мэргэжлийн бус хүн албанд томилогдсон учраас түүнийг дагасан мэргэжлийн бусууд Богдын захиргаанд шавах нь ойлгомжтой. Дандаа хууль хүчний байгууллагаас тэтгэвэрт суусан хүмүүсээс гадна хууль зөрчсөн үйлдлээр шалгагдаж буй хоёр ч хүн томилогджээ. Нэг нь бүр яллагдагчаар татагдаж хэрэг нь шүүхэд шилжээд байгаа аж. Ийм үл бүтэх хийгээд ажлаа огтхон ч мэдэхгүй нөхрийн хажуугаар нөгөө Энхтөрийн Цогбадрал гэгч ёстой бурхангүй газрын бумба галзуурна гэдэг шиг Богдын захиргаанд даам гарч байна гэнэ. Байгууллагаас гарч буй бүхий л албан бичиг Богдын захиргааны албаны даргын гараар дамжиж албаны дарга л тамга дардаг гээд бод. Уг нь хуулиар бол хориотой, шууд л ял сонсож, энэ байгууллагаас хөөгдөх ёстой үйлдлийг Э.Цогбадрал хийж байгаа ч түүнд хариуцлага тооцох чадамжтай хүн энэ салбарт алга… Н.Ганзориг Яамны төрийн нарийн бичгийн дарга С.Цогтгэрэлтэй хамтран Богдын захиргааны газарт (өөртөө) шалгалт оруулжээ. Шалгалтаар “Төрийн захиргааны албан хаагчийг сонгон шалгаруулж, томилох үйл ажиллагаанд хяналт шалгалт хийхэд Төрийн албаны тухай хууль тогтоомж зөрчиж, томилсон томилгоо байхгүй хэдий ч нэг албан хаагчийн ангиллыг буруу тогтоосон байна. ТУСГАЙ ХАМГААЛАЛТТАЙ ГАЗАР НУТГИЙН ХАМГААЛАЛТЫН ЗАХИРГААНЫ АЛБАНЫ ДАРГА ГЭСЭН ТӨРИЙН ЗАХИРГААНЫ АЛБАН ТУШААЛ БАЙХГҮЙ БӨГӨӨД АЛБАН ТУШААЛЫН ТОДОРХОЙЛОЛТГҮЙ, АЛБАН ТУШААЛЫН ЗЭРЭГЛЭЛГҮЙ АЛБАН ХААГЧИЙГ ТОМИЛСОН ТОМИЛГОО НЬ ХУУЛЬД НИЙЦЭХГҮЙ ШИЙДВЭР БАЙНА” гэж дүгнэжээ. Энгийнээр тайлбарлавал Энхтөрийн Цогбадралыг Төрийн албаны тухай хууль зөрчиж, байхгүй албан тушаалд томилжээ. Гэхдээ бүр томилсон томилгоогүйгээр томилжээ гэж энэ шалгалтаар илрүүлсэн байгаа юм. Уг шалгалтыг 2024 оны нэгдүгээр сарын сүүлээр авч, 2024 оны 2 дугаар сарын 7-ны өдөр танилцуулсан байдаг ч үүнээс хойш бүтэн 6-н сар хууль бусаар томилогдсон, томилсон томилгоо байхгүй нөхөр одоо ч цалин аван ажилласаар байгаа нь НОЦТОЙ АСУУДАЛ юм. Энхтөрийн Цогбадрал зүгээр ч энэ байгууллагад ажлаагүй. Тэр байгууллагынхаа тамгыг атгаж, хүссэн албан бланк дээр тамга дарж, Богдын захиргааг хувийн өмч шигээ л ашиглаж байна. Уг нь зүгээр л нэг албаны дарга… Гэвч… Цөөхөн жишээ дурдахад “Тернатур”, “БЛМТУР”, “МДтревел” зэрэг хамар хочит Тордайн Ганболдын хамаарал бүхий компаниуд ямарч зөвшөөрөлгүйгээр нүхтийн аманд барилга барьж байгаа бөгөөд арыг нь мэдээж Э.Цогбадрал хариуцдаг. Мөн Монголын сайтын холбооны Ерөнхийлөгч Б гэх залуугийн зөвшөөрөлгүй барилга энд баригдаж байгаа. Мэдээж Э.Цогбадрал арыг нь дааж байгаа учраас Богдын захиргаатай хамааралтай болоод Цогбадралтай холбоотой хэвлэл, сошиал дахь бүх асуудлыг Монголын сайтын холбоо хариуцна гэсэн үг. Ингэж Э.Цогбадрал төрийн албыг ашиглан хувьдаа ашиг олох хэрэглүүр болгоод байна. Ингэхэд энэ Э.Цогбадрал гэгчийг яагаад Богдын захиргаанд ингэтэл нь дархлагдчихав аа… Анх түүнийг М.Дорж гэх шоучин нөхөр Богдын захиргаанд ирэхдээ ажилд авч байсан гэж өмнө нь мэдээлж байв. Өөрөөр хэлбэл Б.Бат-Эрдэнэ сайдын тушаалаар Богдын захиргаанд томилогдсон болж таараад байна. Гэвч яг ямар албанд томилогдсон томилгоо байхгүй. Тэгээд ч Богдын захиргаанд албаны дарга гэх албан тушаал байхгүй болохыг 6 сарын өмнөх нь шалгалтаар тогтоочихсон байдаг. Нэг ийм л ДАРХЛАГДСАН нөхөр Богдын захиргаанд тамга атгаж байгаа бөгөөд С.Одонтуяаг салбарын сайд болоход манай намын хүн сайд боллоо гэж хамгийн ихээр баярлаж ингээд ч зогсохгүй одоогийн дарга Н.Ганзоригийг “чи миний оронд албаны дарга болоорой. Хоёул Путин Медведев шиг албан тушаалаа хоорондоо сэлгээд явья” гэж ярилцдаг болсон гэнэ. Э.Цогбадралыг ингэж даам гарахад юу ингэтэл нөлөөлөв… Э.Цогбадралын ах Энхтөрийн Галбадрал гэж нөхөр бий. Сан-Франциско хотод консулаар ажиллаж байсан. Өөрийгөө Цахиагийн Элбэгдоржийн зөвлөх байсан гэж рекламдах дуртай цүнх баригчдын нэг. Мон-Атом гэх төрийн компанийг санхүүгийн алдагдалд оруулж, дампууруулах шахсан ч Сан-Франциско руу консулаар шагнагдан явж байсан Э. Галбадрал гэгч л дүүгээ ингэж даам гарахад нөлөөлөөд байна уу гэж хардахаар. Гэхдээ С.Одонтуяад хэрхэн нөлөөлсөн бэ? Э.Галбадрал, Э.Цогбадрал нарын ах дүүс бусдыг 700 гаруй сая төгрөгийг залилсан хэрэг одоо улсын мөрдөн байцаах газар шалгагдаж байна. Тэд Хятадуудтай нийлж “Азын хүч РЛК” нэртэй компани байгуулж. Энэ компанид хөрөнгө оруулж байсан Хятад иргэнийг залилжээ. Бодвол ах нь нөлөө бүхий, дүү нь Богдын захиргааны тамга атгагч гэх мэтээр сэнхрүүлж байгаад л залилангаа хийсэн байх. Ер нь ийм ажилдаа гаршчихсан юм биш үү… Ийм гэмт хэргийн хоршил болсон ах дүүс Богдын захиргааны газрын тамгыг албан ёсоор атгахаар 200, 300-аад сая төгрөг тараагаад яваа сураг бас дуулдлаа. Бодвол Богдын захиргааны даргын сэнтийг авлигадаж байгаад л авчихна гэж бодсон юм байлгүй. Э.Цогбадралын хувьд АТГ-т материалаа өгч асуудалгүй гэдэг бичгээ гаргуулж аваад өнөө маргаашгүй албан тушаалдаа томилогдохоор Салдангийн Одонтуяагийн шийдвэрийг хүлээж байгаа гэнэ. Өгсөн мөнгө нь багадах нь эсвэл шударга ёс үнэртэх нь үү… Ер нь Э.Цогбадрал гэгч Богдын захиргааг удирдах чадамж боловсролтой хүн үү гээд CV (анкет)-г нь харвал инээд хүрмээр. Тэр 2009-2012 онд Улаанбаатар эрдэм сургуулийг Англи хэлний орчуулагчаар төгсчээ. Тэгснээ 2018 онд Төрийн удирдлагаар магистр хамгааласан байгаа юм. Англи хэлний орчуулагч хүн яаж Төрийн удирдлагаар МАГИСТР хамгаалдаг юм бэ? Болдог юм уу? Мөн Төрийн албанд дарга болох гэж байгаа хүн чинь ядаж л Төрийн захиргааны албанд 3-аас дээш жил ажилласан туршлага энэ тэр байх хэрэгтэй биз дээ. Гэтэл 2022 онд томилгоогүй, огт байдаггүй албан тушаалд томилогдсон этгээд одоо би дарга болмоор байна гээд бусдыг авлигадаад яваад байж болдог юм уу. Боловсролгүй, залилан луйварчин этгээд л төрийн байгууллагыг удирдах дээрээ тулж ингэтлээ хямарсан гэж үү манай төрийн алба?
